भारतीय जनता पार्टी ,ठाणे शहर,नवयुग मित्र मंडळ,ठाणे महापालिका आणि फिटिस्तान – एक फिट भारत आयोजीत सोल्जरॅथॉन विजय रन स्पर्धा
ठाणे : १९७१ च्या भारत – पाक युद्धात भारतीय सैन्याने प्राप्त केलेल्या विजयाचा गौरव करण्यासाठी दरवर्षी १६ डिसेंबर हा दिवस सैनिकांच्या सन्मानार्थ विजय दिवस म्हणुन साजरा केला जातो. त्या अनुषंगाने अलौकिक शौर्य गाजवणाऱ्या भारतीय सैनिकांप्रती कृतज्ञता व्यक्त करण्यासाठी संपूर्ण भारतभर १७३ ठिकाणी विजय रन कार्यक्रम होणार आहे. त्याचाच एक भाग म्हणुन येत्या रविवारी १८ डिसेंबर रोजी सकाळी ६ ते ८ या कालावधीत हिरानंदानी मेडोज चौकात भारतीय जनता पार्टी ,ठाणे शहर,नवयुग मित्र मंडळ,ठाणे महापालिका आणि फिटिस्तान – एक फिट भारत यांच्या संयुक्त विद्यमाने सोल्जरॅथॉन -विजय रन आयोजित करण्यात आली आहे. ठाणे भाजपा जिल्हाध्यक्ष आमदार निरंजनजी डावखरे, ठाणे शहराचे लोकप्रिय आमदार संजयजी केळकर यांच्या मार्गदर्शनाखाली भाजपच्या माजी नगरसेविका स्नेहा आंब्रे, ठाणे भाजपाचे उपाध्यक्ष रमेश आंब्रे यांच्या पुढाकाराने ही सुदृढतेचा संदेश देणारी मॅरेथॉन संपन्न होणार आहे. अशी माहिती फिटिस्तानचे कॅप्टन अवतारसिंग बिंद्रा यांनी शुक्रवारी शासकिय विश्रामगृहात आयोजित पत्रकार परिषदेत दिली.यावेळी आमदार संजय केळकर,माजी नगरसेविका स्नेहा आंब्रे,भाजपा उपाध्यक्ष रमेश आंब्रे,लालचंद जाधव, दिनेश दाभोलकर, राजेश सावंत,शरद कोचर,अखिलेश मिश्रा, विश्वनाथ घाणेकर जयसिंग, पवन ठाकूर,राहुल मोदवाडीया,कैलास वडोदरा, दीपक तरकाला, नितीन वडोदरा उपस्थित होते.
भारताचे माजी राष्ट्रपती भारतरत्न डॉ. ए.पी.जे. अब्दुल कलाम यांच्या विचारांच्या प्रेरणेतुन माजी सैनिकांनी “फिटिस्तान – एक फिट भारत ” ही संस्था सुरु केली आहे.या संस्थेच्या सहकार्याने आपल्या शूर सैनिकांच्या शौर्य आणि बलिदानाची आठवण जागवण्याहेतु तसेच युवा पिढीला नैतिकता, मूल्ये आणि भारतीय सशस्त्र दलांच्या गौरवशाली इतिहासाबद्दल प्रवृत्त करण्यासाठी रविवारी १८ डिसेंबर रोजी सकाळी ६ ते ८ या कालावधीत सोल्जरॅथॉनचा हा उपक्रम राबवण्यात येत आहे. मॅरेथॉन स्पर्धकांना प्रोत्साहित करण्यासाठी सार्वजनिक बांधकाम मंत्री रविंद्र चव्हाण, जिल्हाध्यक्ष आमदार निरंजन डावखरे, आमदार संजय केळकर ,माजी खासदार विनय सहस्त्रबुद्धे,भाजपा प्रदेश सरचिटणीस माधवी नाईक, जिल्हाधिकारी अशोक शिनगारे,ठामपा आयुक्त अभिजीत बांगर यांच्यासह अनेक माजी लष्करी अधिकारी उपस्थित राहुन स्पर्धकांना तसेच उपस्थितांना शारीरिक आणि मानसिकदृष्ट्या तंदुरुस्त जीवनशैलीची प्रेरणा देणार आहेत.
या सोल्जरॅथॉनमध्ये वॉर्मअप एक्सरसाईज, भांगडा नृत्य, झुंबा, महाराष्ट्रीयन पारंपारिक पोशाख नऊवारी साडीमध्ये फॅशन वॉक इन आदी उपक्रम होणार आहेत. त्याचबरोबर ठाण्यातील विविध शाळांतून आलेले विद्यार्थीसुद्धा रन, वॉक, सायकलिंगमध्ये सहभागी होणार आहेत.अशी माहिती आयोजक रमेश आंब्रे यांनी दिली.
46,700 total views, 1 views today