लसीकरणाचा लाभ घेण्याचे महापौर व आयुक्तांचे आवाहन
ठाणे – ठाणे महापालिकेच्या आरोग्य विभागाच्यावतीने समाजातील तृतीयपंथीसाठी पार्किंग प्लाझा या लसीकरण केंद्रावर सकाळी ११.०० ते २.०० या वेळेत ‘’विशेष लसीकरण मोहीम’’ राबविण्यात येत असून सर्व तृतीयपंथीनी याचा लाभ घेण्याचे आवाहन महापौर नरेश म्हस्के आणि महापालिका आयुक्त डॉ. विपिन शर्मा यांनी केले आहे.
ठाणे महापालिकेच्यावतीने कोरोनाविरुद्धच्या संसर्गाला प्रतिबंध करण्यासाठी लसीकरणाची मोहीम व्यापक प्रमाणात राबविण्यात येत आहे. या लसीकरण मोहिमेंतर्गत समाजातील सर्व घटकांना सामावून घेण्याचा प्रयत्न महापालिकेच्यावतीने करण्यात येत असून शहरातील तृतीयपंथी देखील या लसीकरणापासून वंचित राहू नयेत यासाठी विशेष लसीकरण मोहीम राबविण्यात येत आहे.
या लसीकरण मोहिमेंतर्गत स्वतःचे आधारकार्ड आणि इतर कोणतेही ओळखपत्र असणाऱ्या तसेच ओळखपत्र नसलेल्या तृतीयपंथीना देखील महापालिकेच्या पार्किंग प्लाझा या लसीकरण केंद्रावर सकाळी ११.०० ते २.०० या वेळेत लस घेता येणार आहे. तरी शहरातील सर्व तृतीयपंथीनी लसीकरणाचा लाभ घेण्याचे आवाहन ठाणे महापालिकेच्यावतीने करण्यात आले आहे.
या विशेष लसीकरणाबाबत काही शंका असल्यास 09167253130 या हेल्पलाईन क्रमांकावर संपर्क साधण्याचे आवाहनही महापालिकेच्यावतीने करण्यात आले आहे.
423 total views, 2 views today