ठाणे महापालिकेच्या लेखा परीक्षक विभागाने सुरू केली कोवीड रूग्णालयांची झाडाझडती, जादा आकारणी केल्याचे सिद्ध झाल्यास रूग्णास परत मिळणार वाढीव रक्कम
१९६ आक्षेपित देयके, २७ लाख रूपयांची आक्षेपित रक्कम, रूग्णालयांना पाठवणार नोटीस
ठाणे : महापालिकेने घोषित केलेल्या खासगी कोवीड रूगणालय व्यवस्थापनाने कोरोना बाधित रूग्णांकडून जादा बिल आकारल्याचे सिद्ध झाल्यास सदरची वाढीव रक्कम तात्काळ रूग्णांच्या खात्यात परत करण्यातचे आदेश महापालिका आयुक्त डॅा. विपिन शर्मा यांनी दिले असून त्यासाठी मुख्य लेखा परीक्षकांच्या अधिपत्त्याखालील विशेष पथकाने शहरातील १५ कोवीड रूग्णालयांची तपासणी करून जवळपास २७ लाख रूपयांची १९६ आक्षेपित देयकांची नोंद केली आहे. या सर्व रूग्णालयांना महापालिकेने नोटीस देण्याची कार्यवाही सुरू केली आहे.
महापालिकेने खासगी कोवीड रूग्णालयाने त्यांच्याकडे दाखल झालेल्या कोरोना बाधित रूग्णांकडून किती देयक आकारावे याच दर यापूर्वीच निश्चित केले असून त्यानुसार रूग्णालये आकारणी करतात किंवा नाही याची तपासणी करण्यासाठी महापालिकेचे मुख्य लेखा परीक्षक किरण तायडे यांच्या अधिपत्याखाली विशेष पथक नेमण्याचा निर्णय महापालिका आयुक्तांनी घेतला होता.
त्यानुसार या पथकाने महापालिका हद्दीमधील जवळपास १५ खासगी कोवीड रूग्णालयांची तपासणी केली. त्यांनी कशा प्रकारे रूग्णांना देयक आकारले आहे याची तपशीलवार माहिती घेतली. या पथकाकडे १५ कोवीड रूग्णालयांमधून आतापर्यंत एकूण १७५२ देयके प्राप्त झाली आहेत. त्यापैकी ४८६ देयकांची या पथकाने तपासणी करून एकूण १९६ आक्षेपित देयकांची नोंद केली आहे. या एकूण १९६ आक्षेपित देयकांची रक्कम ही २७ लाखांपेक्षा जास्त आहे.
या सर्व आक्षेपित देयकांबाबत संबंधित रूग्णालयांकडून तात्काळ खुलास मागविण्याचे आदेश महापालिका आयुक्त डॅा. विपिन शर्मा यांनी दिले आहेत. संबंधित रूग्णालयांकडून खुलासा प्राप्त झाल्यानंतर त्याची शहानिशा करून ज्या रूग्णालयांने एखाद्या रूग्णांकडून वाढीव रक्कम वसूल केल्याचे सिद्ध झाल्यास ती जादा आकारण्यात आलेलली रक्कम संबधित रूग्णाच्या खात्यावर परत करण्याचे आदेश महापालिका आयुक्तांनी दिले आहेत. त्यानुसार या सर्व रूग्णालयांना नोटीस बजाविण्याची कार्यवाही सुरू करण्यात आली आहे.
420 total views, 1 views today