भाजपाची शहर प्रशासनाकडे मागणी
बदलापूर : बदलापूर शहरात गेल्या काही दिवसांपासून कोरोना बाधितांच्या संख्येत झपाट्याने वाढ झाली आहे. त्यामुळे बदलापुर शहरात आणखी कोविड केअर सेंटरची आवश्यकता असल्याने बदलापूर पूर्वेकडील तालुका क्रीडा संकुलात १०० बेडचे कोविड केअर सेंटर सुरू करावे, अशी मागणी भाजपाचे माजी शहराध्यक्ष व ठाणे जिल्हा नियोजन समिती सदस्य संभाजी शिंदे यांनी पालिकेच्या प्रशासकांकडे केली आहे. दरम्यान क्रीडा संकुल सज्ज ठेवण्याचे निर्देश या पूर्वीच देण्यात आल्याचे प्रशासक जगतसिंग गिरासे यांनी सांगितले.
बदलापूर शहरात गेल्या १५ दिवसात कोरोनाबाधित रुग्णांच्या संख्येत मोठ्या प्रमाणात वाढ झाली आहे. बदलापूर पश्चिमेकडील सोनिवली येथे पालिकेच्या माध्यमातून कोविड केअर सेंटर सुरू करण्यात आले असले तरी तेथे ऑक्सिजन व व्हेंटिलेटरची व्यवस्था उपलब्ध नाही. त्यामुळे कोरोनाबाधित रुग्णांना खाजगी रुग्णालयांच्या त्रासाला सामोरे जावे लागत आहे. कोरोना प्रतिबंधात्मक उपाययोजना करण्यासाठी अलीकडेच महाराष्ट्र शासनाने पालिकेला ७ कोटी रुपयांचा निधी मंजूर केला आहे. या निधीतून सोनिवली येथील कोविड केअर सेंटरमध्ये १५० बेडची व्यवस्था करणे तसेच ऑक्सिजन, व्हेंटिलेटर आदी सुविधा देणे शक्य आहे. त्याचबरोबर कारमेल शाळेसमोर असलेल्या तालुका क्रीडा संकुलातही सर्व सोयीसुविधायुक्त कोविड केअर सेंटरची उभारणी करणे शक्य आहे. याठिकाणी उपलब्ध असलेल्या इमारतीत डॉक्टर व रुग्णालय कर्मचाऱ्यांची व्यवस्था करता येऊ शकेल, तसेच उर्वरित जागेत बेडची उभारणी करणे शक्य होईल, असे संभाजी शिंदे यांचे म्हणणे आहे. त्याचप्रमाणे बदलापूर जवळील चामटोली येथे सुरू करण्यात आलेले कोविड डेडीकेटेड खाजगी हॉस्पिटल पालिकेने ताब्यात घेतल्यास कोरोनाबधितांवर चांगल्याप्रकारे उपचार करणे शक्य होईल, असेही शिंदे यांनी सांगितले. यासंदर्भात आपण बदलापूर पालिका प्रशासनाला निवेदन सादर केले असल्याचे संभाजी शिंदे यांनी सांगितले.
बदलापुर शहरात मच्छी मार्केट, भाजी विक्रेते व रस्त्यावरील फेरीवाले यांच्याकडून सुरक्षित अंतरचे पालन होत नसल्याकडे संभाजी शिंदे यांनी लक्ष वेधले आहे. कोरोनाचा प्रादुर्भाव टाळण्यासाठी पोलीस व पालिकेच्या समन्वयाने याठिकाणी सुरक्षित अंतर राखले जाईल यासाठी उपाययोजना करण्याची मागणी संभाजी शिंदे यांनी केली आहे. गर्दीच्या ठिकाणी पाण्याच्या टाक्या तसेच सॅनिटायजर वा हँडवॉश उपलब्ध करून देऊन नागरिकांना हात धुण्याची व्यवस्था करून द्यावी, खरेदी व इन्स्टॉलेशन प्रक्रिया पूर्ण झालेली असतानाही धूळ खात पडलेल्या बायोटॉयलेटची उभारणी करून नागरिकांना सदरची सुविधा उपलब्ध करून द्यावेत, सध्या कोरोनाच्या पार्श्वभूमीवर सामान्य थंडी तापाच्या रुग्णांची होत असलेली प्रचंड गैरसोय टाळण्यासाठी विभागवार फिवर तपासणी क्लिनिक सुरू करण्यात यावे, आदी मागण्याही आपण निवेदनाद्वारे केल्या असल्याचे संभाजी शिंदे यांनी सांगितले.
दरम्यान कल्याण कर्जत मार्गावर असलेल्या तालुका क्रीडा संकुलात कोविड केअर सेंटर सुरु करण्याबाबत निर्देश देण्यात आले आहेत. त्याप्रमाणे काम सुरु झाले आहे. क्रीडा संकुलात हे केंद्र सुरु केल्याने समोरच ग्रामीण रुग्णालय आहे त्याचा लाभ या कोविड केअर सेंटरला होईल असा विश्वास उपविभागीय अधिकारी जगतसिंग गिरासे यांनी व्यक्त केला.
455 total views, 1 views today