ठाणे – शासनाच्या धोरणानुसार महापालिका कार्यक्षेत्रात लसीकरण मोहिम सुरू असून लस उपलब्धततेनुसार अत्यंत नियोजनबद्ध पध्दतीने लसीकरणाचे काम सुरू आहे. परंतु मागील काही दिवसांमध्ये 45 व त्यावरील नागरिकांचा लसीकरणासाठी केंद्रावर अत्यल्प प्रतिसाद मिळत आहे, याचा अर्थ बहुतांशी नागरिकांचा पहिला डोस पूर्ण झाला असल्याचे दिसून येते, या पार्श्वभूमीवर शासनाने 18 ते 44 या वयोगटातील लसीकरण पुन्हा सुरू करावे अशी मागणी महापौर नरेश म्हस्के यांनी मुख्यमंत्री उध्दव ठाकरे यांच्याकडे लेखी पत्रान्वये केली आहे.
शासनाच्या निर्देशानुसार दिनांक 1 मे पासून 18 ते 44 या वयोगटातील नागरिकांचे लसीकरण सुरू करण्यात आले होते, परंतु सद्यस्थितीत सदरचे लसीकरण बंद आहे, महापालिका कार्यक्षेत्रात वय वर्षे 45 व त्या पुढील नागरिकांचे लसीकरण लसींच्या उपलब्धततेनुसार अत्यंत नियोजनबद्ध पध्द्तीने महापालिका प्रशासनाने राबविले, त्यामुळे बहुतांश लसीकरण केंद्रावर सध्या गर्दी नसल्याचे दिसून येते. सद्यस्थितीत लसींचा पुरवठा नियमित असून या अंतर्गत वय वर्षे 18 ते 44 या वयोगटातील नागरिकांचे लसीकरण केल्यास लसीकरणाचे उद्दिष्ट देखील लवकरात लवकर साध्य होवून जास्तीत जास्त नागरिकांचे लसीकरण होण्यास मदत होईल व भविष्यात ताण पडणार नाही.
यासाठी वय वर्षे 18 ते 44 या वयोगटातील नागरिकांचे लसीकरण सुरू करण्यात यावे अशा आशयाचे निवेदन महापौर नरेश म्हस्के यांनी राज्याचे मुख्यमंत्री उद्ध्वजी ठाकरे यांना दिले आहे. शासनाच्या माध्यमातून या लसीकरणास मान्यता मिळेल अशी अशा महापौर यांनी व्यक्त केली आहे.
428 total views, 1 views today