सभागृह नेते अशोक वैती यांची प्रशासनाकडे मागणी
ठाणे – प्रतिबंधात्मक उपाययोजनेतंर्गत ठाणे शहरात लसीकरण मोहिम यशस्वीरित्या सुरू आहे. कोविड १९ च्या काळात सर्व यंत्रणांबरोबर पोलीसांनी देखील आपली सेवा अत्यंत चांगल्या रितीने बजावत आहेत, तसेच अनेक पोलीसांना कोविडची लागण झाल्याने त्यांनी प्राणही गमवावे लागले आहे. २४ तास सेवा देणाऱ्या पोलीसांच्या कुटुंबियासाठी ठाणे शहरातील पोलीस वसाहतींमध्ये लसीकरण केंद्र सुरू करावे अशी मागणी सभागृह नेते अशोक वैती यांनी आयुक्त डॉ. विपिन शर्मा यांच्याकडे केली आहे.
ठाणे शहरात सद्यस्थितीत लसीकरण मोहिम चांगल्या पध्दतीने सुरू असून आजपर्यत सव्वा तीन लाखाहून अधिक नागरिकांचे लसीकरण देखील झाले आहे. ठाणे महापालिकेच्या विविध आरोग्य केंद्रावर लसीकरण सुरू आहे, त्याच पध्दतीने ठाणे महानगरपालिका हद्दीतील सर्व पोलीस वसाहतीमधील पोलीसांच्या कुटुंबाकरिता लसीकरण केंद्र सुरु करावे, जेणेकरुन पोलीसांच्या कुटुंबियांना ते राहत असलेल्या ठिकाणी जावून लस घेता येईल. लसीकरणासाठी आवश्यक असलेल्या सर्व साधनसामुग्रीसह व्यवस्था करुन कोविड प्रतिबंधात्मक लसीकरण केंद्र सर्व पोलीस वसाहतीमध्ये सुरू करणेचे आदेश सभागृह नेते अशोक वैती यांनी प्रशासनाला दिले आहेत.
पहिल्या टप्प्यात फ्रंटलाईन वर्कर म्हणून अनेक पोलीसांनी आपले लसीकरण करुन घेतले आहे. परंतु त्यांच्या कुटुंबियांचे अजून लसीकरण झालेले नाही. यासाठी पोलीस वसाहतीमध्ये लसीकरण केंद्र सुरू केल्यास त्याचा निश्चितच फायदा होईल असेही अशोक वैती यांनी नमूद केले आहे.
462 total views, 3 views today