किरीट सोमय्या, निरंजन डावखरे यांनी वेधले लक्ष
ठाणे : ठाणे महापालिकेच्या ग्लोबल हब येथील विशेष कोविड हॉस्पिटलमधील बेजबाबदार कारभाराची राज्यपाल भगतसिंग कोश्यारी यांनी गंभीर दखल घेतली आहे. यासंदर्भात कडक कारवाई करण्याचे राज्य सरकारला निर्देश देण्याचे आश्वासन राज्यपाल कोश्यारी यांनी आज दिले.
ग्लोबल हब येथील रुग्णालयात दाखल केलेले वृद्ध भालचंद्र गायकवाड बेपत्ता झाल्याचे रुग्णालय व्यवस्थापनाने नातेवाईकांना सांगितले होते. यासंदर्भात विरोधी पक्ष नेते देवेंद्र फडणवीस यांनी आवाज उठविल्यानंतर, ठाणे भाजपानेही महापालिका आयुक्त व पोलिसांकडे निवेदन देऊन चौकशीची
मागणी केली होती. तसेच गुन्हा दाखल करण्याचा आग्रह धरला होता. या संदर्भात राज्यपाल कोश्यारी यांची भाजपाचे ठाणे प्रभारी किरीट सोमय्या व आमदार, जिल्हाध्यक्ष निरंजन डावखरे यांनी आज राजभवन येथे भेट घेतली. या वेळी गायकवाड व सोनावणे कुटुंबियांनीही आपल्या भावना राज्यपालांकडे व्यक्त केल्या. या वेळी भाजपाचे महापालिकेतील गटनेते संजय वाघुले, नगरसेवक भरत चव्हाण, कृष्णा पाटील, भाजयुमोचे सारंग मेढेकर आदींचीही उपस्थिती होती.
ठाणे शहराला कोरोनाचा विळखा पडला असताना महापालिकेकडून विशेष सतर्कतेने रुग्णांवर उपचार होण्याची गरज होती. मात्र, महापालिकेने कोट्यवधी खर्चून उभारलेल्या विशेष कोरोना रुग्णालयात गैरव्यवस्था असल्याकडे सोमय्या व डावखरे यांनी लक्ष वेधले. तसेच गायकवाड-सोनावणे कुटुंबियांच्या भावनांशी ठाणे महापालिकेने खेळ केला असल्याचे नमूद केले. यासंदर्भात कारवाई करण्याचे आश्वासन राज्यपालांनी दिले.
औषधांचा काळाबाजार
कोरोनाचा संसर्ग रोखण्यासाठी प्रभावी असलेल्या रेमडेसिविर व टॉसिलिजुमैब औषधांचा मुंबई महापालिकेच्या काही कर्मचार्यांकडून काळाबाजार चालू असल्याप्रकरणी कारवाईची मागणी राज्यपाल कोश्यारी यांच्याकडे करण्यात आली.
राजगृह हल्लाप्रकरणी निवेदन
भारतरत्न डॉ. बाबासाहेब आंबेडकर यांचे निवासस्थान ‘राजगृह’वर करण्यात आलेल्या हल्ल्याप्रकरणी कडक कारवाई करावी, या मागणीचे निवेदनही आमदार निरंजन डावखरे यांनी राज्यपालांना दिले.
608 total views, 2 views today